Ande Romane Nevipe e publika sila šajipe te ašunol autentikano krlo e romengo. I Emisija anel informacije pe romani čhib, thaj phutarol than vi pala e teme save but vrijama sesa bidžangle – sar kaj si e istorijsko thaj ađivesutne amalikane phućipa.  Akava projekto ćerdo si katar e terne romenđi organizacia Phiren Amenca thaj romano portalo RomaNet, a o Centro palo Demokratsko Tranzicia thaj i Radio Televizija Podgorica dinde dumo te ćerdolpe akaja emisija.

„I emisija Romane nevipe ćerdam te ašunolpe o zoni/avazi e Romengo sar trubul thaj bi predrasudengo.Ande kaja emisija ni manga te vaćara samo katar e teme save si aktuelno, nego vi katar e teme save ninaj but rodljarde sar kaj si o mudardipasko e Romengo ano dujto themesko maripe, ali vi te dikha sar e institucie ćeren bući,“  vaćarda o Elvis Beriša, uredniko katar o portalo RomaNet.

Milan Sekulović, o novinari thaj editoro televizijako Podgorica phenol kaj vi e medije si došale golese kaj i romani čhib ni ašundolpe ano putardo than, thaj kole sebepesko, ande i decizia te den dumo kale projektese.

Čačipe si kaj ani Crna Gora trajil jekh baro numero e Romengo save vaćaren pe piri romani čhib. Numaj, o problemi si kaj baro numero e Romendar ni đanen piri dajaći čhib. Me misliv/gindiv  kaj amen, sar medije, siamen kontribucia kaj e Roma ni đanen piri čhib, golese kaj i romani čhib naštil te ašundol khatinde. Golese, manga te ašundol amendar, phenda o Sekulović.

Pala akava projekto si jekh cikno timo savo ćerol bući, von ni gatisaren samo i produkcia. Numaj, pe pire zeja ljinde vi o nakhavipe e emisijako pe romani čhib.

„Me sem o glavno uredniko, thaj vi nakhavav sa so ćera bući ane romani čhib thaj katar i romani čhib. Trubuv te vaćarav kaj akala si anglune informativno nevipe pe romani čhib ani Crna Gora ke akava formato,“ duma Elvis Beriša.

Andar kava projekto e džene ano timo salen šajipe te sikaven vi majbut, o kamermano sano filmipe, a i terni novinarka sar te gatisarol e romane nevimata. O Milan Sekulović si jekh katar e sikavdune savo mothoda thaj sikavda e novinarka bazikane džanglipe thaj o drom đi ke televizijaće nevimatar: ,,E manušenca savenca ćera bući pe akava projekto, konkretno e novinarkasa Jasmina Beriša, ola amen zuravdam vi majbut akale bućaće vi kaj voj sasa gatime te ćerol kaja bući. Sikadam la sar te ćerol e nevimata, save si kola bazikane standardora kana ćera akaja bući, sar trubul te avolamen i komunikacia e institucienca savenca ka ćera bući ke amare nevimata“, phenda.

Vov vi phandla thaj vaćarda kaj e Romane nevipe ninaj samo jekh emisija, akava si o avazi-zoni amare manušengo savi zaslužisarda te avol dikhli thaj vi ašundi.

Majbut dikhen ano linko: https://youtu.be/wWLkbAWViXQ?si=e9TH-2julX0qZbNN