Sombešipe Crna Gorako e po bare  (41) usvojisarda o programo thaj o ćhidipe Vladako savo predložirisarda o mandataro Zdravko Krivokapić.

Pala o avazodeipe, pe savo avazo dinde 41 deputatore, 28 deputatora sesa mamuj, a jekh bi avazesko, o Krivokapić, sar po redo, položisarda i zakletva.

,,Hav sovli kaj mi bući ka ćerav la sar phenol o Konstitucionalo thaj e krisora, odgovorno thaj godjasa, te pomožil manđe o Devel“ e alava si e Krivokapićese sovlase.

Vov palikerda savorenđe thaj phenda kaj sile nada da kaj lengo sojekh bući ka avol ano korist Crna Gorako.

I nevi Vlada pe savi ka avol predsjedniko o dr  Krivokapić ka avol la jekh than e potpredsjednikose thaj 12 ministarenđe. Jekhutno potpredsjedniko/ishanarno ka avol o Dritan Abazović, o lider ko Građanski pokret URA. Vov ka avol zadužime ki koordinacija e sektoresi arakhajmase sar kaj si e Policija, Vojska thaj ANB agencia.

Avazodeipe ćerdilo napal e trinđiveseso vaćaripe ano Sombešipe. Ma te bistara, kaja nevi Vlada si ćerdi pala e 30 berš bi e manušencar katar o DPS. Sode ka trajil i nevi Vlada si but pućipa, ama o nevo presedniko e Vladako phenda kaj ni ka avol lenge lokhe te ćeren bući.

„30 berš ćorde anglal amende, bićinde sa so šajisarde te bićinen, pherde samo pire džepora. Amen trubul amen vakti te anda kaja phuv po redo sar turubul. Kaja phuv ka avol putardi savorenđe, samo kolenđe save ćoren lenđe naj than“, phenda o Krivokapić.

Naslovna fotografija: Internet